أغلب اللي يبدون في الأسهم يبدون غلط: يحملون تطبيق، يفتحون شارت مليان مؤشرات، ويدورون على "توصية" من قروب. وبعد كم صفقة يحسون إن السوق ضدهم. المشكلة مو فيهم، المشكلة إن ما أحد رتّب لهم الطريق.
في هذا المقال بعطيك خارطة طريق واضحة لتعلم التحليل الفني من الصفر في السوق السعودي، بالترتيب اللي أنصح فيه بعد أكثر من 20 سنة في السوق.
أول شي: وش هو التحليل الفني؟
التحليل الفني هو قراءة حركة السعر على الشارت عشان تفهم سلوك المشترين والبايعين. ما يقول لك وش بيصير بكرة بشكل أكيد، لكنه يساعدك تشوف الاحتمالات وتحدد وين تدخل ووين تطلع ووين تحط وقف الخسارة.
يعني التحليل الفني أداة لاتخاذ قرار مدروس، مو كرة بلورية.
الخطوة 1: تعلّم تقرأ الشمعة
كل شمعة على الشارت تحكي قصة فترة زمنية كاملة: سعر الافتتاح، والإغلاق، وأعلى سعر، وأقل سعر. الشمعة الخضراء يعني الإغلاق أعلى من الافتتاح، والحمراء العكس.
- جسم الشمعة: المسافة بين الافتتاح والإغلاق
- الذيل: وين وصل السعر وارتد
- حجم الشمعة: يعطيك فكرة عن قوة الحركة
قبل ما تتعلم أي نمط، لازم تعرف تقرأ شمعة وحدة صح.
الخطوة 2: افهم الاتجاه
السعر يا صاعد، يا هابط، يا عرضي. الاتجاه الصاعد قممه وقيعانه أعلى من اللي قبلها، والهابط العكس. هذي الفكرة الأساسية اللي بنت عليها نظرية داو، وهي أقدم وأهم نظرية في التحليل الفني.
قاعدة بسيطة تحميك من أخطاء كثيرة: لا تعاكس الاتجاه وأنت مبتدئ.
الخطوة 3: الدعم والمقاومة، وبعدها مناطق العرض والطلب
الدعم مستوى يرتد منه السعر لفوق، والمقاومة مستوى يرتد منه لتحت. لكن في الواقع السعر ما يرتد من رقم واحد بالضبط، يرتد من منطقة.
هنا يجي منهج العرض والطلب: تحديد المناطق اللي تجمعت فيها أوامر كبيرة قبل حركة قوية. شرحته بالتفصيل في مقال العرض والطلب في التحليل الفني.
الخطوة 4: الفريمات
نفس السهم يبان لك صاعد على فريم الساعة وهابط على اليومي. عشان كذا تعوّد تبدأ من الفريم الكبير (الأسبوعي واليومي) تعرف الاتجاه العام، وبعدها تنزل للفريم الصغير تحدد نقطة الدخول.
الخطوة 5: إدارة المخاطر قبل أي شي
هذي الخطوة اللي أغلب الناس يأجلونها، وهي الأهم. تقدر تكون محلل ممتاز وتخسر محفظتك لأنك دخلت بحجم كبير بدون وقف خسارة.
القاعدة اللي أشتغل عليها: لا تخاطر بأكثر من 1% من محفظتك في الصفقة الواحدة.
مثال: محفظتك 50,000 ريال، يعني أقصى خسارة في الصفقة 500 ريال. دخلت على سعر 30 ووقف الخسارة على 28، يعني مخاطرتك 2 ريال في السهم. إذن حجم صفقتك 500 ÷ 2 = 250 سهم، مو أكثر.
وإذا ودك تفهم ليش وقف الخسارة صديقك مو عدوك، اقرأ وقف الخسارة: الصديق المكروه اللي يحمي محفظتك.
الخطوة 6: سجّل صفقاتك
كل صفقة تدخلها، اكتب: ليش دخلت، وين وقف الخسارة، وين الهدف، ووش صار. بعد 20 صفقة بتشوف أخطاءك تتكرر بوضوح، وهنا يبدأ التطور الحقيقي.
أخطاء تأخر المبتدئ
- يكدّس المؤشرات على الشارت لين ما يشوف السعر
- يدخل بناءً على توصية بدون ما يفهم السبب
- يعزّز على سهم خسران بدل ما يلتزم بوقف الخسارة
فصّلتها في مقال 3 أخطاء تدمّر حساب المتداول المبتدئ.
كم ياخذ وقت أتعلم التحليل الفني؟
الأساسيات تقدر تفهمها في أسابيع. لكن الثبات في التطبيق ياخذ شهور من الممارسة والتسجيل والمراجعة. اللي يوعدك إنك تصير محترف في أسبوع، يبيعك وهم.
من وين تبدأ اليوم؟
ابدأ بإدارة المخاطر، لأنها اللي تخليك تكمل في السوق وأنت تتعلم. حمّل ملف إدارة المخاطر المجاني، يحسب لك حجم الصفقة ووقف الخسارة والهدف بثواني.
وإذا تبي المسار كامل مرتب خطوة بخطوة من أول مصطلح لين قراءة الشارت، هذا بالضبط محتوى الدورة التأسيسية.
محتوى تعليمي لرفع الثقافة المالية فقط، وليس توصية بشراء أو بيع أي ورقة مالية.